● ديل نحنا ●
وبنتواصل...
عشان البينا يستاهل
ونتساءل ...
كمان سلامات
وننثر الضحكات
وكيف نحنا نتقابل
وكيف قيلتو بااخوانا
ومين جاكم ومن جانا
ونجعل البساط أحمدي
وناخد في الكلام ندي
ويسرقنا الزمن والساعات بتعدي
وما بنترك شي
من قولة سلام ياناس
للواقفين والجلاس
ولمن نحبس الأنفاس
والضحك في عيونا اما الرأس
يبقى عديل زي كراس
مليناهو بالحروف كلمات
وبالصور الجميلة والقفشات
تتناول كمان شربات
أو الشاي باللقيمات
ويمضي الزمن والود بيناتنا أهل
ما ضروري قبيلتك أو أي ملل
ما كلنا سوداني ليهو أصل
زنجيا كان أو عربي يستاهل
يقول الضاد أو نرطن كأن طبل
يرسل نغمات معلومة فيها أمل
في البال زي شمسا ترسل
شعاعا من وراه جبل
أو بين سحابات مطرها هطل
خلى البراح في دعاش
يا زول دي مطرها رشاش
اما لو سرح فكرنا أوطاش
نلملم الضحكات يا زول وين ماش
يجيك الرد منساب كما الإنعاش
إن شاء بكره نتلاقى
وكمان تاني نتساقى
كؤوس الود فراقا
الدنيا قانونا دمعة حراقا
لكن ويا ويلنا من لكن أكيد حنتلاقا
.
● ود قطبي ● ١٣ \ ١١\ ٢٠١٩ □ السودان
ليست هناك تعليقات:
إرسال تعليق