( كفايه ياكورونا )
صبرنا عليكي ياكورونا كتير
عذبتينا وتعبتينا من كتر التفكير
إيه آخرتها معاكي وناويه تعملي ايه فينا
اتحملنا شهور وتعبنا منك عايزه فين تودينا
حرمتينا م الليالي الحلوه ومعيشانه في نار وعذاب
عذبتي جوانا الأشواق وزادت في عنينا نظرات اللوم والعتاب
خليتي حياتنا اللي كانت من شهور حلوه
صبحنا مليانين خوف منك وليالينا مُره
وصبحنا خايفين ومن بعضنا مرعوبين بره وجوه
ماكوناش متصورين تبعدينا يوم عن حبايبنا
وتخطفي منا فرحتنا والفراق يعذبنا
فرقتي بين حبايب و روحها عايشه فينا
ولا انتي ناويه كتير تاني تلاعبينا
ارجوكي ياكورونا اهجري بلادنا وماتظلميها
خلينا نعيش مش خايفين ونشوف ناس اتعودنا عليها
وخلينا نفتح مدارسنا و مساجدنا وكنايسنا اللي كتير اشتقنا ليها
أرواحنا متعطشه لروحانيات وليالي رمضان
نصلي التراويح في المساجد ونختم فيها القرءآن
هو انتي ملة ابوكي ايه ياكورونا
هو انتي كافره ومتسلطه علينا وع اللي جابونا
خلي الود يرجع يعود بين الناس ولمة الأهل والخلاَّن
ويرجع العشق بين الأحبه والود والوصال
بحق جاه النبي واهل بيته ابعدي عنا واهجري البلاد
مش كفايه اللي بنعانيه ياظالمه من الخونه و الإرهاب
كفايه اللي عملتيه فينا لحد كده من فراق بين الأحباب
فارقينا وخلينا نعيش حياتنا في راحة بال
وبلاش تظلمينا ياكورونا ويا ناس انتي قصداهم
بلاش تخلي السيئه تعم وتخدينا معاهم
هو احنا ناقصين ياكورونا كمان تمن الكمامات
ما انتي عارفه يادوب اسبوع وبتنتهي المرتبات
روحي لحالك الله يجازيكي وخلينا في حالنا
كفايا ياكورونا الله لا يسامحك ع اللي جرالنا
مش حاسين بالأمان وسرقتي تفكيرنا ليل ونهار
ومعيشانه احنا وولادنا والعالم كله في عذاب ومرار
خواطر ( أشرف الدغيدي ).
ليست هناك تعليقات:
إرسال تعليق